Medlemsjuks i den norske kyrkja?

Ja ein kan jo begynne å lure. Eg har vore utmeldt av kyrkja den norske sidan februar 1988. Altså i 21 år. Det har eg til og med ein attest frå menigheita i Gloppen som bekreftar. Men i dag dukka det opp i posten eit valkort til kyrkjevalet. På valkortet står det: du er oppført som medlem i den norske kyrkja og kan bruke dette valkortet for å avgi di stemme. GRRR..sånnt vert eg arg av! Det kan vere mange slike som eg, som har meldt seg ut og trur at ein dermed vert sletta i det statlege registeret, men som likevel ikkje er det. Gubben opplevde same elendigheita; utmeldt av kyrkja, men valkort i posten. På heimesida til kyrkja oppgjev dei at 80,7% av befolkninga er medlemmar av den norske kyrkja. Ein kan vel gruble litt over kor gale dette talet eigentleg er. Statskyrkja har nok "snikinnmeldingar" etter mitt syn til å sleppe unna med sånnt slurv i medlemsregistreringa. Dobbel GRRR.

PÅ SIGERSPALLEN

No veit eg kvifor inspektørane, vaktmeistrana og rektorane må begynne på jobb att i god tid før elevane kjem. Dei må spikre pallar. Premiepallar. Slike som dei brukar på idrettsmeisterskapa for å heidre dei som vart best, nest best og nest nest best. Dersom Høgre får vilja si i skulenpolitkken skal vi nemleg byrje å premiere elevane når dei er oppnår gode resultat.

Elevane skal lønnast for god kunnskap frå 1. klasse. Ja frå dag 1 på skulen skal dei lære kven som er nr. 1 nr 2. og nr. 3. Barneromma til dei flinkaste skal dekorerast med alle moglege slags premiar. Det startar nok med nokre små merker; gongetabellknappen, større-mindre-enn-pins, eller kan-namn-på-hovudstadane-i-norden-medaljar. Premieskåpa veks, og skulen vert betre og betre.

Når elevane kjem på ungdomsskulen har dei gått på skule i 7 år, og dei flinkaste gler seg sjølvsagt til opprykk. Men kva slags opprykk har vi til dei purbertale skuleessa? Ipodar, iphonar og andre dingsar? Eller skal vi slå til med fine sydenturar?
Lærarane bør bruke bundentida si til å pønske ut nye og flottare premiar slik at undervisninga vert enno betre, og elevane enno flinkare. I timane bør ein tenkje ut og arrangere enno meir staselege premieutdelingar for kvar gong. Gjerne med pressa til stades.

Kva så med taparane? Altså dei som ikkje vert nr.1, nr. 2 eller nr.3? For det vert vel nokre av dei og. Sidan lønningssystemet (eller klassisk tingjing som dei heiter på fagspråket) viser seg å virke på både dyr og menneske så bør ein vel innføre ymse straffemetodar for dei som ikkje gidd å bli best? Skammekrokar og gapestokkar bør tilbake.

Og kva med spanskrøret? Det fungerte jo det og på sitt vis…
Trur jammen eg skal støtte Høgre ved neste val eg. Dei har så mange gode tankar om skulen.

Kven treng syden??

Ikkje eg....Lofoten er perfekt sommarferiestad. Nordavinden gjer ingen ting. Treng ikkje ha dårleg samvit når ein ikkje vil bade, og det er rett godt med varm kaffi frå termos.

HERLEGE LOFOTEN!

Der er godt å vere tilbake på kjende stiar. Kjenne den freske sjølufta og gå turar i passe varmt sommarver. Eg trur eg blir att her...

FINNAN

Dei er i grunn ikkje så ille romsdalsjella heller...
I herleg vårver: lettskya, men mykje sol og varmt nok til å bli solbrent på leggane.
Finnan ligg vel 1780 m opp i høgda, men med bilen parkert på omlag 800 m ca ved toppen av Trollstigen vart det ein overkomeleg himmelfartsdag for gammalt folk..:)

SKITURAR I MAI ER BEST

Fjellturane i mai er definitivt dei kjekkaste, og klart mest behagelege turane. Skiføre er bra, ikkje for varmt og ikkje for kaldt. Slepp å ha på lue og vottar, slepp å mase med fluger. Skyfri himmel på toppen gjev vidsyn og klårsyn. Sunnmørsalpane; el ombligo del mundo!
Då får ein heller tåle å bere skia over skoggrensa.

KLINELÅTAR PÅ 80`TALET...tidsreisa fortset.

I høve russejubileet på Sandane vart eg ut på kvelden utfordra til finne fram nokre gode gamle klinelåtar. -På PC-en som liksom skulle fungere i staden for DJ-Sjur som var engasjert til festen vår, men som aldri dukka opp. SIC. Det var lite av sorten å finne, men berga "klinedans"-sekvensen med ein heimebrent CD med 80`talsmix eg hadde teke med i veska til forspielet.

I ettertid har eg funne fram og rangert dei 6 beste klinelåtane frå 1980-talet. Eg huskar (eh..litt flaut..) at eg hadde tatt opp Careless Whisper etter kvarandre på ei heil kassettside, så ein skulle nesten tru denne toppa lista mi. Men det gjer den altså ikkje. (Egentlig burde han etter nærmare vurdering ikkje vore med i det heile. Den er jo litt kvalm..men for å heidre dei i russekullet som hadde eigen foreining: KMAGMEH: "Klanen Mot At George Michael Er Homo" ...eh...; får han vere med.) Men ein klar vinnar etter mitt hjarte er Suddenly, tett fulgt av Hello.

Her er lista:

1. Suddenly med Billy Ocean, 1987
2. Hello med Lionel Richie, 1984
3. You`re the inspiration, Chicago, 1984
4. Purple Rain, Prince, 1984
5. Careless Whisper, George Michael, 1984
6. Arturs theme, Christopher Cross, 1982